對識玩股票的人，教期權講10分鐘都嫌多，來來去去就係四式，有錢short put等接平貨，有貨short call高位出貨，無咁多錢long call睇升，long put睇跌，的確如此。我亦贊同「衍生工具是深淵」，好容易輸大錢。明白一點講，期權輸大錢的多數係唔夠按金/現貨但SHORT張數太多的人，或LONG CALL/LONG PUT，睇錯方向的人。
股票買賣的道理更簡單：「只買績優肯派息的大股，在超賣時入市、超買時出市；或長線分批買入儲貨，持之以恆」。教股票，可能一分鐘就搞掂，「只要手持現金，等幾年一次的大跌市出現，買入幾隻大藍籌就會賺；另一個方法就係月供十年以上、持之以恆、只要股市向上就會賺」。
只不過，世間事「知易行難」。
知道一個道理、人人都覺得岩，唔代表自己會接受，
接受一個道理、如果無落場去實踐、亦唔會識得做（連股票戶口都無，點樣撈底/月供呢？），
識得做亦未必肯去做（股災未完，等多一陣先買。咁貴點月供呀、不如等下個月先供。藉口多多），
肯做未必做有機會做得到（老婆生仔，老闆急CALL，架車入廠。意外多多），
做得到亦未必可以堅持到底（大把人撈到底，賺少少又走左，跟住又去高追輸錢）
另外，有錢無錢我覺得係命生成。我有信仰，我覺得人生係照住一個超級大老板的戲本去發展，佢係唔會俾您睇到場戲個結局會係點，只會不斷咁搵不同的拍檔或對手，有人幫您，有人害您，一齊完成呢場戲。散場之後，又會有另一場好場等住，但可能那時自己會變成觀眾享受別人的戲，而不用再粉墨登場了。
「人若賺得全世界，卻失掉生命，有甚麼益處?」。賺錢係重要，但更重要係賺到錢，可以跟您愛佢/佢又愛您的人分享喜樂，金錢以外有太多東西值得我們花時間去追求。人生出來兩手空空，無帶錢來人間，也不能帶錢去陰間。人生所賺到的錢或還唔到的債，最終都是留給家人或社會去接手的。睇得通，就無煩惱。
股票期權買賣是目前最公平的市場：所謂「公平」，係無論是一手散戶或千億大戶，都是遵守「相同的遊戲規則」進行交易，交易的對手係期交所，並不需要擔心對手風險。「公平」可以從多方面體驗：
a. 自行決定做買方或賣方（即看好或看淡皆有同等獲利機會），
b. 自選期權金額（風險與回報自行決定），
c. 自選行使價（用甚麼低位接貨、甚麼高位出貨完全由自己控制）
d. 做LONG的可以自選和行使月份適應自己的資金調配，做SHORT PUT的要隨時預備現金接貨、做SHORT CALL的隨時預備股票出貨。在合約期任何一個交易日，LONG & SHORT皆可以隨時以市價平倉，一手散戶或千億戶大戶同等看待，非常公平。
e. 可以自選合約手數（一手、十手、一百手悉隨尊便）調較現金和持貨比重，可以提早解除合約獲利離場或止蝕控制上行、下行風險。
f. 股票期權實物交收，就算非常有錢也不能瘋狂沽空，因為只要有貨才能沽，否則好容易被挾淡倉。這跟現金交收的指數期權或期指或牛熊證、CALL/PUT輪不同，大戶錢多有優勢，通常只要有足夠按金（老外印銀紙最有效率）就可以隨意大手沽空期指，再大插一些弱勢股並控制權重股的升幅便能推低指數套利。但在股票期權市場唔敢做得太過份，因為造LONG CALL的大戶有權要貨，只要大戶看好，隻股值得吸納，好友可以大手行使LONG CALL，淡友便要真金白銀買貨補倉，隻股一定會有支持。實物交收的結算，係保證有錢LONG CALL一定可以在指定價接貨貨、有貨LONG PUT一定可以在指定價沽貨，做空軍並沒有資金優勢。所以股票期權對「老老實實」的投資者，有錢才買貨、有貨才沽貨的、是最公平。
沒有留言:
發佈留言